[align=center]الحلقة الرابعة :


اليوم ودي أغير الطرق شوي ودي ارجع إلى المويلح زمان يوم كنا صغار نلعب وسط النخل (نمسك العرجون ونسويه حصان وهات نتسابق كلن مسوي( عرجونه) مثل الحصان ومن اللي يسبق وان كان مناحي موجود راحت علينا ) ومرات نجيب السعف ونسوي منه مروحة أو فرينه ونحطها في اتجاه الريح واللي تدور فرينته أكثر هو الفايز (براءة عيال القرية) ومرات نسوي طخطاخ وهو عبارة عن اخذ جزء مستقيم من أي (عرجون) ثم يشرح من المنتصف مرتين وتكون الشريحة الخارجية رقيقة جدا ونحركه في حركة ترددية يطلع صوت وهات .وإذا بغينا نخليها ناره وشرار نجيب البخصه وهي الجزء الداخلي (للوقاله) يعني (الدوم) (والله إن قراها الوجهاويه يا لطيف ألطف ما حنا سالمين وحنا ننكر العلاقة مع الدوم ) ونأكل الدومه أول (وتري طعمها لذيذ جدا واسألوا مناحي .اكبر واحد يرقى دوم في الديره مناحي. وبعدين نشيل الجزء الخارجي ونجد البخصه وهي جزء صلب فيه طرف مدبب (ألحقنا بالصور ياا لبير الشمالي) ونأتي بمسمار (ما يهم مصدي أو جديد المهم مسمار وأن ما لقينا مسمار من خلال رحلت البحث المضنية نستخدم تقنية البحث من خلال احد أهم القوانين الفيزيائية وهو استخدام المغناطيس الموجود داخل سماعة المسجل (طبعا المسجل اللي يخرب ينطش ما فيه بنقالي يصلح ذيك الأيام ) الين نلقى المسمار وان ما لقينا المسمار استخدمنا الكلبه في مزط أي مسمار من الصندقة (ترجم يا مترجم ياحليللاه ) عقب ما لقينا المسمار نرجع إلى البخصة وهنا تظهر الفنيات نأتي بالطرف النحيف ونستخدم المسمار برفقة في فتح جزء بارز يوجد داخله جزء ابيض يسمى (الجمارة) طبعا نأكلها وهي طعمه ولذيذة بعد ذلك نستخدم المسمار من خلال (البرم) في توسيع تلك الفتحة وندخل بها رأس الكبريت ونحركه في كل اتجاه حتى (يتحترك ) داخل فتحة البخصة لين نملا ها منه ثم تأتي الحرفنة مرة أخرا حيث يجب أن يدق المسمار برفق الين ينشب في البخصة ثم نحضر دمس مصلفحة (ترجم يا مترجم) وفي حركة خفيفة نمسك البخصة من الجزء البعيد عن المسمار ونقلبها ونضربها بقوة على الدمس المصلفحة ويظهر صوت انفجار قوي جدا (وتعال عاد لو لقوا أعواد الكبريت بدون رأسها الأسود (الكتلة حصلت بس حنا من زود الذكاء ندفن العيدان ) وهات يا ليل ما أطولك ومرات البعض ينزف دمه من كثر النار وعدم الاستخدام الصحيح لهذه اللعبة الخطرة .
وأحلا شيء عند الشباب يوم تهب الشراقي كل واحد الصبح (يمكن قدام الفجر يجري على الساقيه) ونلقط النبق كل واحد في حجرة واللي يجمع أكثر هو الفايز طبعا ما فيه ..إلا. أكل ما علينا من(اللي في بطنه) والبعض يشمسه شوي كي يخرج ما بداخلة .
اما القفاعات اذا جاء القمري فكلام ثاني ما غير نحضر الجريد ونسحلكة من السعف وكل واحد أمه تسوي له قفاعة ويوم تجي تلقى لك قمريتين أو ثلاثة طايحات بالقفاعة.

ملحوظة لم ارغب في تنقيه المصطلحات الدارجة حفظا للتراث ويمكن التعليق على أي مفردة غير واضحة كي تتضح للجميع.

والى اللقاء في الحلقة الخامسة[/align]