تحية طيبه ..
انا بصراحه في هالوطن كله دايم اسمع حقوق المرأه .. وكل الشعب عن بكرة أبيه يتمنظر بحقوق المرأه .. وعند المحك تكون النتيجة لم ينجح أحد !
المشكله ليست في حقوق المرأه ووضعها في بلادنا .. المشكله فيمن ينطق بكلمة "حقوق المرأه"
انا من رأيي لو الألمان ينتجوا علاج للرجاجيل السعوديين لمعالجتهم من حالة الحساسيه من حقوق المرأه !
وعلاج ثاني وهو الأهم يعالج حالة الأنفصام في الشخصيه !
اول نقطه لازم يعترف الرجل السعودي انه يعاني من حالة انفصام في الشخصيه وتعلن بالجرايد الرسميه والقنوات الرسميه والأهليه انه رجل ملحوس قدام الحريم !
مش مهم قولو انت المنفصم ... ايه منفصم وستين منفصم !
اول عالجونا كرجاجيل في التعامل مع المرأه ثم طالبونا بحقوقها .. لاحرج على المريض ..
كل مرأه تطالب بحقوقها على طول وبدون اعطاء مساحه للحوار نسقطها ان المرأه تبحث عن المخصر والسوق والدجه وهي لك الله مصليه وصايمه ومتصدقه لكن تركيبة زوجها واخوها وابوها وقبيلتها وقاضي محكمتها ومشرع اللوائح غلط في غلط !
لا نعمم مطالب الشواذ ونقول كل النساء يطالبون بالتحرر تحت غطاء الحريه .. لكن من الممكن الانسان اذا حُرم من كل شي ووجد منفذ معين يطغى في الحصول عليه وتكون بعض المطالب فيها تجاوزات يمكن معالجتها في حالة وجود النفسيات المتزنه !
واللي يحصل بالقصيم تحديد ارفضه جمله وتفصيل ولا يعمم لانه مجموعه فريده من قوانين قلة أدب في التعامل مع بني الانسان عموما وليس المرأه فقط !
ابتداءا يجب ان يفهم الرجل السعودي المتحدث عن حقوق المرأه انه هو سبب هضم حقوقها !
الرجل السعودي الذي يرفض المخصر هو من يشتري تلك العباءه ! سواء بفلوسها بفلوسه المهم هي في بيته !
النظام السعودي هو من سمح للتجار باستيرادها .. هو ذات النظام الذي خول للهئيه اللف بالشوارع ووضعها بمعارضهم عشان يهدو الناس عن الفتنه !
طيب اختصروا المسافه وروحو للنظام وأهدوه ! ولا المسأله بس عرض حال ؟؟!
الرجل السعودي الذي يرفض تبرج المرأه ويدين المرأه اللي تبين عيونها وما تلبس قفاز هو نفسه جالس بسيارته أمام نجد ! وبعينه يشوف اليماني من خلف قزاز المحل وهو يرفع الجينز يشرح مميزاته ويشرح مادون الجينز .. وبعينه يرا مصونته تخلع القفاز عشان تطلع الفلوس من الشنطه وتحاسب حق الجينز! وعينه بس على اي سعودي شاف يد حرمته ! اليماني ما يعض ! وتأكيدا انه ولد فله يسألها عساك اخذتي الجينز ؟؟ ترد تقول ان الخبير اليماني قال يلصق !! قال طيب نروح للبنغالي !
لكن لما تقول له تعال وديني للبلديه ابغى اطلع تصريح للمحلات يقول ليش ونا خروف ؟؟
فيه شغله ثانيه في تفصيل البيوت .. كل مجمعات النساء سواء مدارس او سكن تلقى الأغلال حتى على الشبابيك وياويل الحكومه لو ماحطت الزنك والبلكاش على الشبابيك ! وللي شكا اصلا في بيته عمر شباكه ما انقفل ! لا ويمكن يتطرق يقول السلامه اولا .. ثم يقول البيت لازم يتنفه ! يعني البيت لازم يدخله هوا وشمس !
طيب والادميات اللي بالمدارس والسكن مالهن حق مثل جدران البيت بالشمس والهوا ؟؟؟
ثم نجي للمنبر وخطب الجمعه والدروس الله لا يقطعنا منها ويعطينا من خيرها .. ويكفينا شر كل ذي شر !
يتكلمون عن الحوريات بشكل يخرق الذوق العام !
ااااااااه ياحوريه ! والله هذي سمعتها بخطبة جمعه بصوت سكسي حاد وبكيفه يزعل من يزعل !
ااااااه ياحوريه وااااه ياحوريه ووصف فضيع وحياه تحس برغبتك فيها ولما ترجع للبيت تشوف غوريلا !
تكره اليوم اللي جمعك فيها وكل شي ضدها تسويه بايحاء المنبر !
يعني من باب الذوق تكلم عن الحوريات في الاخره لازم كان يتكلم عن طباع حوريات الدنيا ويرغبنا فيهم .. مو يكلمنا كأننا من المسجد عالمقبره !
يخلينا نكره الدنيا اللي فيها معاشنا !
وطبعا ضمنيا وبداخلنا نتخاسر الحقوق على الغوريلا والسمتح القابعه بالبيت تنتظرك على الغدا وهي تحرى الجرجير والشمام من سوق الجمعه لكن للأسف يجيها واحد مشتت الذهن يطالع فيها وهو مفهي يتذكر حورية الخطيب ويتفل الف تفله عليها !
بمعنى لا الخطاب الديني يخدم المرأه ولا اللوائح تخدم المرأه كأنسانه عند المحك فكيف نرتجي انها تاخذ حقوقها ؟؟
حقوقها مو بالتبرج والسفور والرقص والملعنه .. ولا بالدلال المزيف .. انا ابغى امرأه تقدر تروح للشيخ وتقول هذي بطاقتي وهذا وجهي ! وابغى اسوي وكاله او الغي وكاله !
مو الدوله اللي عينت الشيخ هي ذاتها اللي حطت صورة المرأه بوجهها بالبطاقه ؟؟؟
والبطاقه ليش ؟؟ تخللها جنبها ؟؟
طيب لما وجه "عوره" ليش الدوله حطته ؟؟
طيب لما وجه المرأه"عيب" ليش خلت فيه شيخ قبيله !!
"العوره" شرع ,, و "العيب" عادات !
والدوله ضلع ثالث !
وكلن له اتجاه منفرد وهذه هي مصيبتنا !
ازدواجيه مفرطه للرجل امام حقوق المرأه بحاجه لحشيش يسطله ويفصله تماما عن الارض !! او نظام قوي الكل يحترمه يربطه بأرضه وعاداته وتقاليده وشرعه ويعامل الحرمه كحوريه لها قيمتها .. مو قيمتها براتبها تقعد تخش بجمعيه طول السنه عشان في الاجازه ترمح فيه خارج البلاد وتقول اسماء مدللـه .. ياحيليلاه لها ! وتلقاه بين ربعه انا سافرت وسافرت وهو لو ماتزوج المسيكينه ماشم القريدحه وثلبه !
طيب والنتيجه ؟؟
الحل بيد المرأه .. مو يسوون تجمعات وخرابيط وفوضى .. كلها طال عمركم جمعيه !!بدل ما تروح فلوسها لزوجها ويبني فيها بيت ثم يجحدها ,,تصرفها أحسن فيما يرضي الله ورسوله وتاخذ فيها اجرنا !! ويتفقون مع منظمة الدواء العالميه ويتعبوا على دعم اختراع علاج للتركيبه الغلط !!او تمسك جريد اخضر كل ظهر جمعه وعالباب تقول له بالفصحى : هل أتى الشيخ بذكر حوريات ؟؟ ان قال ايه فاله الجريد الاخضر اللي يخليه يعقل ويحس انه بالدنيا ويفهم أن
نساء الدنيا هن الطريق الى حوريات الآخره!!
عندها فقط ستأخذ المرأه حقوقها الشرعية والفرعيه!
وارجع واقول التركيبه غلط !
احترامي ومحبتي للجميع
دمتم بخير