قاف الوفاء لاهل الوفاء حق وانصاف
ماللوفاء غير الوفاء من وصيفي
هاض الضمير وهزه الشوق للقاف
من جمة بحور الشعر له غريفي
تواردن عندي ثقيلات وخفاف
واخترت جزلة عن هزيل الخفيفي
ماهي ضحاضيح على لسان هراف
واعوذ بالله عن خطات الهريفي
اعد لها عد الذهب عند صراف
واسعى لها في كل علمن طريفي
واليوم سجي ياقدم خط الأسياف
في محتفل مابين برن وسيفي
عند الوكيل ولابته ريف من ضاف
أهل النبا وأهل السخا بالمضيفي
أهل الرسن والسيف والكيف الأشراف
زبن الدخيل وملحقين الرديفي
من بعدها للقاف وقفه ومحراف
خص الشريف ابن الشريف الشريفي
سلام يالنادر علي سلم وإلطاف
سلام نسناسه برادن لطيفي
عبدالرحيم ابوه والعنبر اسلاف
والطيب طبعن للجناب العفيفي
ابو محمد سعد منهو له إسعاف
ياما نخيته والنعم بالسعيفي
ماصد عني ما عطى وجهي اكتاف
شيّال حملن عند غيره كليفي
بين القبايل سيرته راس مناف
واقف على راس الطويل المنيفي
محشوم عند اللي يعرفون الاعراف
عند الزحول مطوعين العسيفي
محسود عند حاسد شرب هم واحساف
اعمى بصر ومن البصيره كفيفي
اعمى عن الزينه وللشين شواف
عوق المكارم وللنميمه حليفي
دوم الحسد يسكن خفى ناسن ضعاف
ولا ياكل إلا بالضمير الضعيفي
جربت من وقتي هدب صحب الاصياف
يشفيك ربي ياسحاب المصيفي
يابو محمد ماتحوّفك حوّاف
قدوة نشاما للجناب النظيفي
افرش لكم قلبي من الكاف للكاف
واحط لك مركاك فوق القطيفي
قلبي على مثلك وشرواك ميلاف
يمشي مع الساقه ولا له نكيفي
كلمة وفا مالي بها شف واهداف
ردة وفا لاهل الوفا طاب كيفي
واختم جوابي والمثل عد ماطاف
على الذي دينه يسمى الحنيفي
شفيعنا في يوم محشر وميقاف
هادي هدانا بالنهار المخيفي
الشاعر؛ سلطان بن حمود بن مسيعيد العطوي
ضباء : الأربعاء 27-10-1431هـ