الشال الابيض والمساء والمقادير
والليله اللي مات من هو نساهـا
البنت هذي غير نعناعهـا غيـر
عشقتها عشق النجـوم لسماهـا
يالعنبوها جت تسـوق التباشيـر
جتني وانا اللي ميتٍ من ضماهـا
خيال ماادري حلم ماادري تفاكير
بس الوكاد اني سبحت بفضاهـا
تشيلني واركب على الغيم واطير
لا الارض تقضبني ولااصل مداها
رسمتها في غيمتيـن ونواويـر
وهي ارسمتني ضحكتين بسناهـا
حاولت ادور للسعـاده تفاسيـر
ولقيت حتى الورد ينبت وراهـا
يسعد صباحك يا صباح العصافير
لا غردت والكون يضحك معاهـا
يا كيفها كيف الـدلال المباهيـر
بيدين من هـم هايميـن بغلاهـا
الذ من شربـة حليـب المغاتيـر
واشهى من الرمان مزة شفاهـا
قالت وداع وقلت تصبح على خير
ولولا الحياء رجلي تسابق اخطاها
جف الكلام وضاع صدق التعابير
كله مـن النعنـاع ذاب وخذاهـا